کراچی(رپورٹ:عمران فیروزی) ناجائز منافع خوروں نے رمضان المبارک سے قبل عوام کو مہنگائی کا بڑا جھٹکا لگا دیا۔رپورٹ کے مطابق ماہ مقدس سے قبل ہی اشیائے خوردونوش کی قیمتیں آسمان سےباتیں کرنے لگیں۔ چیک اینڈ بیلنس نہ ہونے کے باعث تاجروں نے حکومتی پرائس لسٹ بھی ہوا میں اڑا دی۔میڈیا ذرائع کے مطابق کراچی میں پیاز 300، ٹماٹر 200 روپے فی کلو فروخت ہونے لگاجبکہ سموسے رول میں استعمال ہونے والی شملہ مرچ عوام کی پہنچ سے دور ہوگئی اور ایک دن میں قیمت 200 روپے فی کلو سے 700 روپے فی کلو تک پہنچ گئی۔شہر قائد کے بازاروں میں لہسن 1000، ادرک 600 اور ہری مرچ 500 روپے کلو تک فروخت ہونے لگی۔ اس کے علاوہ بچھیاکا گوشت 1400 جبکہ مرغی کا گوشت 700 روپے میں فروخت ہورہاہے۔پھل اور سبزیاں مہنگے داموں فروخت ہونے کے باعث غریبوں کی قوت خرید جواب دے گئی ہے۔