اسلام آباد(آغازانقلاب ڈیسک) ن لیگ کے صدر شہباز شریف 201ووٹ لے کر ملک کے 24ویں وزیراعظم منتخب ہوگئے۔ اسپیکر قومی اسمبلی سردار ایاز صادق نے قومی اسمبلی میں وزیراعظم کے لیے ہونے والے انتخاب کے نتائج کا اعلان کرتے ہوئے بتایا کہ حکمران اتحاد کے امیدوار شہباز شریف کے مد مقابل تحریک انصاف کے حمایت یافتہ سنی اتحاد کونسل کے امیدوار عمر ایوب خان نے 92 ووٹ حاصل کیے۔بعدازاں شہبازشریف نے ملک کے 24ویں وزیراعظم کی حیثیت سے حلف اٹھالیا‘صدر مملکت عارف علوی نے نومنتخب وزیراعظم شہباز شریف سے ایوان صدر میں ہونے والی تقریب میں حلف لیا۔ تقریب کا آغاز تلاوت کلام پاک سے ہوا، تقریب میں غیر ملکی سفارتکار، سینئر سرکاری حکام اور سیاسی جماعتوں کے رہنما شریک ہیں،تقریب میں جوائنٹ چیفس آف اسٹاف کمیٹی جنرل ساحر شمشاد مرزا، آرمی چیف جنرل عاصم منیر بھی شریک ہیں۔ اس کے علاوہ آصف زرداری، نوازشریف، بلاول بھٹوزرداری، وزیراعلیٰ مریم نواز، مراد علی شاہ اور سرفراز بگٹی نے بھی شرکت کی جبکہ مختلف ممالک کے سفیر بھی تقریب حلف برداری میں شریک ہوئے۔ وزیراعظم شہبازشریف کی حلف برداری کے بعد وزیراعظم ہاو¿س میں مسلح افواج کی جانب سے انہیں گارڈ آف آنر پیش کیا گیا۔