کراچی(رپورٹ:شعیب عالم)سینٹرل جیل کراچی کے باہر سندھ اسمبلی میں اپوزیشن لیڈر حلیم عادل شیخ کی گرفتاری سے پولیس کو روکنے اور ہلڑ بازی پر ایسٹ زون پولیس نے پی ٹی آئی رہنماﺅں اور کارکنان کے خلاف مقدمہ درج کر لیاہے۔پولیس نے پی ٹی آئی کے ایم این اے فہیم خان، ایم پی اے شاہنواز جدون، راجہ اظہر سمیت30 کارکنان کے خلاف مقدمہ درج کیا ہے۔پولیس کے مطابق نیو ٹاﺅن پولیس اسٹیشن میں درج مقدمے میں ہنگامہ آرائی، کارِ سرکار میں مداخلت سمیت دیگر دفعات شامل کی گئی ہیں۔پولیس حکام کے مطابق مقدمے میں نامزد پی ٹی آئی رہنماﺅں اور کارکنان نے گزشتہ روز سینٹرل جیل کراچی کے باہر ہلڑ بازی کی تھی۔پولیس کے مطابق نامزد پی ٹی آئی رہنماوں کارکنان نے پولیس کو حلیم عادل شیخ کی گرفتاری اور ہمراہ لے جانے سے روکا تھا۔واضح رہے کہ گزشتہ روز کراچی کی سینٹرل جیل میں قائم انسدادِ دہشت گردی کی عدالت نے حلیم عادل شیخ کی ضمانت منظور کی تھی جبکہ جیل سے رہا ہوتے ہی پولیس نے انہیں دوسرے مقدمے میں گرفتار کر لیا تھا۔سینٹرل جیل میں قائم انسدادِ دہشت گردی کی عدالت نے اینٹی انکروچمنٹ افسر کو دھمکانے کے کیس میں حلیم عادل شیخ کی ضمانت منظور کی تھی۔عدالت نے 50 ہزار روپے کے مچلکوں کے عوض اپوزیشن لیڈر کو رہا کرنے کا حکم دیا تھا، جبکہ عدم پیشی پر حلیم عادل شیخ کی عبوری ضمانت مسترد کر دی تھی۔اس موقع پر پی ٹی آئی کے رکنِ صوبائی اسمبلی شاہنواز جدون، راجہ اظہر پولیس اسٹیشن میں موجود تھے جبکہ پولیس اسٹیشن کے باہر پی ٹی آئی کے کارکن جمع ہو گئے تھے۔